A Thief and his Mother

6.14. De puero fure et eius matre
Caxton: Of the yonge theef and of his moder
He whiche is not chastysed at the begynnynge is euyll and peruers at the ende / As hit appiereth by this fable of a yonge child whiche of his yongthe beganne to stele / and to be a theef / And the theftys whiche he maad / he broughte to his moder / and the moder toke them gladly / & in no wyse she chastysed hym / And after that he had done many theftys / he was taken / and condempned to be hanged / And as men ledde hym to the Iustyce / his moder folowed hym and wepte sore / And thenne the child prayd to the Iustyce / that he myght saye one word to his moder / And as he approuched to her / made semblaunt to telle her somme wordes at her ere / & with his teeth he bote of her nose / wherof the Iustyce blamed hym / And he ansuerd in this manere / My lordes ye haue no cause to blame me therfore / For my moder is cause of my deth For yf she had wel chastysed me / I had not come to this shame and vergoyne / For who loueth wel / wel he chastyseth /
And therfore chastyse wel youre wel youre children / to thende / that ye falle not in to suche a caas
[more info]

No comments:

Post a Comment